Categories
Gedigte

“Andringastraat” – Danie Reënwolf

vanoggend in Andringastraat
het ek twee bejaardes op ’n eerste date gesien
ek weet dit, want die oom is amper doof

en ek kon hom oor my oorfone hoor
hy het haar vertel dat sy oorlede vrou
omtrent 5 minute gevat het elke aand

om haar tande te borsel

dis herfs alweer

en hierdie keer weet ek iets van die onweer

wat binnekort deur die skeur in die hemel

die hele dorp gaan kom natlê

soos ’n groot hond pas uit die swembad
diep in die winter nog

gaan hierdie twee mense koffie drink

onder ’n nuwe kombers
ek gaan skryf

asof elke dag my laaste is
en oefen om lief te wees

asof elke mens my naaste is
na al die winters

dink ek nie dat ware liefde

die skaarste is nie
of dat dit die swaarste is nie
dis sommer tussen die die badkamer en die bed

na dertig jaar se saamly
dis om vir daai 5 minute

wat sy haar tande borsel
so nou en dan dit reg te kry
om wakker te bly

One reply on ““Andringastraat” – Danie Reënwolf”

Leave a Reply